Þjóðin lætur ekki ljúga að sér lengur

Þegar ríkisstjórn Jóhönnu Sigurðardóttur og Steingríms J. Sigfússonar færði nýju bönkunum lán heimilanna og smærri fyrirtækja á silfurfati fyrir slikk var þeim jafnframt falið að leysa skuldavanda fólksins eins og fram kom í skýrslu forsætisráðuneytisins um skuldavanda heimilanna, sem birt var í nóvember 2010. Ári síðar, eða þann 17. október 2011, þegar bankastjórar stóru bankanna þriggja mættu á fund efnahags- og viðskiptanefndar Alþingis töldu þeir sig vera að mestu búna með svigrúm til afskrifta á lánum til einstaklinga. Alþingismenn létu það gott heita og þökkuðu vinum sínum fyrir komuna. Nú veit þjóðin að þetta var lygi.

Hvers vegna voru þúsundir heimila leyst upp

Bankarnir þrír hafa skilað hundruðum milljarða í hreinan hagnað á síðustu árum. Á sama tíma hafa fjármálastofnanir hrakið meira en 4.000 fjölskyldur út af heimilum sínum út á rándýran leigumarkaðinn. Stjórnvöld hafa horft aðgerðarlaus á. Og hvers vegna voru þúsundir heimila leyst upp á þennan sársaukafulla og óvægna hátt? Vegna þess að fjölskyldurnar gátu ekki greitt af ósanngjörnum, stökkbreyttum, verðtryggðum húsnæðislánum og samningsvilji fjármálastofnana er enginn. Engin samkennd, engin samábyrgð. Bara hámarksgróði kröfuhafanna og bankastarfsmannanna sjálfra. Þetta vill Dögun stoppa, umsvifalaust.

Dögun mun berjast fyrir hag heimilanna

Ef hagur heimilanna á einhvern tíma að komast í lag á Íslandi og hér á að vera lífvænlegt fyrir fjölskyldur þarf að byrja á því að afnema verðtryggingu á neytendalánum. Ísland er eina landið í heiminum sem er með slíka verðtryggingu. Þeir sem hæst tala á móti þessum lífsnauðsynlegu aðgerðum eru þeir sömu og hæst töluðu um að það yrði að semja um Icesave. En þjóðin lætur ekki ljúga að sér lengur. Nú er komið að fjármálakerfinu, bönkunum þremur, að skila þjóðinni og heimilunum, gróðanum sem Jóhanna og Steingrímur færðu þeim í nafni þjóðarinnar. Það er komið að skuldadögum. Það er komið að uppgjöri. Þjóðin vill réttlæti, sanngirni og lýðræði. Dögun mun berjast fyrir hag heimilanna og afnámi verðtryggingar á neytendalánum fái hún til þess nægan stuðning kjósenda. xT.