Vill fagna komu björgunarskipa

„Þótt það séu byssur þarna um borð þá eru þetta náttúrulega fyrst og síðast björgunarskip,“ segir Kjartan Magnússon, borgarfulltrúi Sjálfstæðisflokks, sem mun í dag leggja fram tillögu í borgarstjórn um að Reykjavíkurborg bjóði erlend björgunarskip velkomin. „Ég veit ekki hvenær Danir hleyptu síðast af byssu – það hefur sennilega verið í seinni heimsstyrjöldinni.“

Kjartan segir ástæðu tillögunnar vera yfirlýsingu borgarstjóra frá árinu 2011 um að erlend herskip væru óvelkomin hingað til lands. Ekki hafi verið kveðið skýrt upp úr um hvort þetta ætti líka við um dönsk og norsk varðskip og flugvélar, sem taka þátt í björgunarsamstarfi með Landhelgisgæslunni.

„Vonandi gengur betur að fá fram afstöðu manna þegar skýr tillaga liggur fyrir,“ segir Kjartan.

Tillagan gerir ráð fyrir að samstarfinu sé fagnað og skipin sérstaklega boðin velkomin.

„Ég trúi ekki öðru en að menn séu ánægðir með þetta samstarf og samþykki þessa tillögu,“ segir Kjartan.