Árborg vill reka eigin skólaþjónustu

Bæjarstjórn Árborgar hefur ákveðið að segja sveitarfélagið úr samstarfi um Skólaskrifstofu Suðurlands og fella sérfræðiþjónustu sem þar er veitt inn í eigið stjórnkerfi.

Úrsögnin er sögð liður í framtíðarsýn fyrir sérfræðiþjónustu skóla í sveitarfélaginu þar sem áhersla er á þróun þjónustunnar til hagsbóta fyrir notendur hennar. Sjö af níu bæjarfulltrúum samþykktu ákvörðunina sem er byggð á úttekt sérfræðinga.

Annar bæjarfulltrúa Samfylkingar og fulltrúi V-lista sögðu að með úrsögninni væri Árborg að bregðast sem stærsta sveitarfélagið á Suðurlandi. „Það er ekki góður samstarfsaðili sem ákveður einhliða að segja sig frá margra ára farsælu samstarfi án þess að eiga gagnkvæmar samræður við samstarfsaðila sína og láta sig varða hvaða áhrif það hefur á sérfræðiþjónustu í hinum sveitarfélögunum,“ bókuðu fulltrúarnir.

Fulltrúi Framsóknarflokks sagði að á meðan það hefði legið í loftinu að Árborg segði sig úr samstarfinu um Skólaskrifstofuna hefði ekkert hinna sveitarfélaganna rætt við Árborg um þá væntanlegu stöðu. „Má furða sig á því að þau hafi ekki gert það ef þeim er umhugað um þetta samstarf,“ bókaði fulltrúi Framsóknarflokksins.