Sitkagreni á Klaustri rauf 25 metra múrinn

Hæsta tré landsins er sitkagreni sem vex á Kirkjubæjarklaustri, að því er fram kemur á vef Skógræktar ríkisins. Þegar skógarvörðurinn á Suðurlandi mældi þar tré nýverið reyndist eitt þeirra 25,2 metrar á hæð.

„Er þetta að öllum líkindum fyrsta tré sem rýfur 25 metra hæðarmúrinn og það hæsta á landinu," segir í umfjöllun Skógræktarinnar. Fjölmörg tré í skóginum sem vex í brekkunum fyrir ofan byggðina á Kirkjubæjarklaustri eru sögð hafa vaxið yfir tuttugu metra hæð og nokkur eru sögð rúmlega 24 metra há.

Þá kemur fram að í skóginum sé eitt af rúmmálsmestu trjám landsins. Þannig er sverasta tréð sagt með um 65 sentímetra þvermál í brjósthæð og um 23,7 metrar á hæð. „Má áætla að trjábolurinn gæti náð þremur rúmmetrum viðar."

Skógurinn á Kirkjubæjarklaustri er í einkaeigu en hefur verið í umsjá Skógræktarinnar síðan 1964. „Trén á Klaustri eru enn í fullum vexti og verður spennandi að fylgjast með vexti þeirra, en þau gætu, miðað við núverandi vaxtarhraða, náð 30 metra hæð á næstu 10 til 15 árum," segir í umfjöllun Skógræktarinnar.