Stór íbúðahús reist við Mánatún

Viðskipti Fulltrúar MP banka, Klasa ehf. og Sveinbjörns Sigurðssonar verktaka tóku í gær skóflustungu að stærstu nýframkvæmd við íbúðahúsnæði frá bankahruni.

Hyggjast félögin auk fleiri fjárfesta reisa 175 íbúðir í þremur fjölbýlishúsum á svokölluðum Bílanaustsreit við Mánatún í Reykjavík.

„Við erum mjög stolt og ánægð með að hafa myndað þennan hóp og sótt fjárfesta að verkefninu enda er þetta sennilega stærsta íbúðabyggingaverkefni í fjölda ára,“ segir Sigurður Atli Jónsson, forstjóri MP banka.

Eins og áður sagði verða reist þrjú fjölbýlishús á reitnum; Mánatún 1, Mánatún 7-17 og Sóltún 1-3. Í húsunum verða alls 175 íbúðir auk bílageymslna. Heildarflatarmál íbúðarýmis verður um 20.000 fermetrar og er áætlaður byggingartími þrjú ár. Þróunarvirði verkefnisins er 7 til 8 milljarðar króna.

„Við höfum mikla trú á þessu verkefni. Staðsetningin er góð og markaðurinn hefur sýnt að mikil eftirspurn er eftir vönduðum íbúðum miðsvæðis í Reykjavík. Þétt samstarf með öflugum stýriverktaka hugnast okkur vel enda höfum við góða reynslu af slíku úr fyrri verkefnum,,“ segir Ingvi Jónasson, framkvæmdastjóri Klasa.