Hrafnista borgar ekki lífeyrisskuldbindingar

Sjómannadagsráð, eigandi Hrafnistuheimilanna, hefur hætt að greiða áfallnar lífeyrisskuldbindingar til Lífeyrissjóðs starfsmanna ríkisins (LSR). Þetta samþykkti stjórnin að gera frá og með síðastliðnum þriðjudegi og tilkynnti Guðbjarti Hannessyni velferðarráðherra og Katrínu Júlíusdóttur, fjármála- og efnahagsráðherra, ákvörðun sína í bréfi. Fréttablaðið hefur bréfið undir höndum.

Heimildir blaðsins herma að fleiri aðilar, sem eiga aðild að Samtökum fyrirtækja í velferðarþjónustu (SFV), íhugi að hætta einnig greiðslu lífeyrisskuldbindinga. Ákvörðun um hvort af því verði mun verða tekin á næstu stjórnarfundum þeirra.

Deilan snýst um hvort svokölluð daggjöld til reksturs hjúkrunarheimila eigi einnig að ná yfir lífeyrisskuldbindingar eða ekki. Daggjöld eru föst krónutala sem greidd er fyrir hvert hjúkrunarrými stofnana sem ekki eru á föstum fjárlögum.

Samkvæmt reglugerð er þeim ætlað að mæta eðlilegum rekstrarkostnaði án viðhalds húsnæðis. Afstaða SFV og aðildarfyrirtækja þess er sú að daggjöldin, eins og þau eru í dag, eigi ekki að ná yfir lífeyrisskuldbindingar. Því er fjármálaráðuneytið ósammála.

Í bréfinu segir að SFV hafi „í mörg ár reynt að fá daggjöld til reksturs hjúkrunarheimila leiðrétt, meðal annars þannig að daggjaldagreiðslur feli í sér upphæðir til greiðslu lífeyrisskuldbindinga […] Þær tilraunir hafa því miður engu skilað, að því er virðist vegna afstöðu fjármálaráðuneytis, þrátt fyrir góðan ásetning margra. Áhugaleysi stjórnvalda við að leysa úr þessu máli er með eindæmum. Það sannar fjöldi ítrekaðra tölvupósta, bréfa og fundarbeiðna frá SFV um málið, þar sem erindum er stundum svarað með mjög „ómarkvissum“ hætti eða alls ekki svarað“.

Forsvarsmenn Hrafnistu segi að í kjölfar mikillar hagræðingarkröfu á síðustu árum sé ljóst að daggjöld dugi einungis til að veita heimilisfólki lágmarksþjónustu. „Óhjákvæmilegt er að greiðsla umræddra lífeyrisskuldbindinga skerði þjónustu heimilisfólks Hrafnistuheimilanna.

Til fróðleiks má geta þess að þessar greiðslur námu um 335 milljónum króna á árunum 2001-2012.“ Fjárhæðin er áætluð um 56 milljónir króna fyrir Hrafnistuheimilin árið 2013.