Fjöldi lista sprengir kjörseðla

Nauðsynlegt er talið að gera breytingar á kosningalögum vegna fyrirsjáanlegs fjölda framboðslista í alþingiskosningunum 27. apríl.

„Fyrirmæli laganna varðandi kjörseðilinn þýða það að framboðum er stillt upp hlið við hlið,“ segir Jóhannes Tómasson, upplýsingafulltrúi innanríkisráðuneytisins. Miðað við stærð núverandi kjörseðils sé aðeins hægt að hafa átta framboðslista á seðlinum.

„Miðað við fyrirspurnir og hringingar sjá menn fyrir sér að framboðin gætu orðið það mörg að það myndi valda vandræðum við að útbúa kjörseðilinn eins og lögin mæla fyrir í dag,“ segir Jóhannes sem kveður stöðuna eins og hún er í dag geta þýtt fimmtán möguleg framboð þótt ekkert sé ljóst um það enn þá. „Það þarf blað sem tekur hálft skrifborð til að ná þeirri breidd,“ bendir Jóhannes á.

Lausnin sem menn sjá fyrir sér felst að sögn Jóhannesar í lagabreytingu sem heimilar að hafa tvær raðir með framboðslistum á kjörseðlinum; efri röð og neðri röð. Þá mætti hafa allt að sextán lista á seðlinum.

Þótt líklega verði framboðslistarnir færri en fimmtán þegar upp er staðið er jafnvel enn von á fleirum því framboðsfrestur rennur ekki út fyrr en fimmtán dögum fyrir kjördag. Í það eru enn tveir mánuðir.

Jóhannes bendir á að hins vegar sé stefnt að því að Alþingi ljúki störfum um miðjan mars. Samþykkja þurfi lagabreytinguna fyrir þann tíma. „Það má segja að við séum einfaldlega að reyna að hafa vaðið fyrir neðan okkur ef þessi yrði staðan,“ segir Jóhannes.

Auk þess sem þetta mál hefur verið til skoðunar í innanríkisráðuneytinu er lagabreytingin nú undirbúin hjá stjórnskipunar- og eftirlitsnefnd Alþingis. - gar