Síldargrúturinn ógn við þúsundir fugla

Fjöldi fugla við Breiðafjörð er með ólíkindum. Þúsundir fugla hafast við í firðinum og graðga í sig síld, lifandi og dauða. Fugli er hætta búin vegna mengunar í Kolgrafafirði á næstu vikum og mánuðum. Sérfræðingar funda um aðgerðir.

Ætisframboð við sunnanverðan Breiðafjörð er þess valdandi að fuglar af fjölmörgum tegundum sækja þangað í tugþúsunda vís. Í fuglatalningu í síðustu viku kom í ljós að fjöldi einstakra tegunda hefur þúsundfaldast frá árunum eftir aldamót. Helst sækir fuglinn í lifandi og dauða síld, sem nú rotnar í Kolgrafafirði. Náttúrustofa Vesturlands hyggst kalla saman sérfræðinga til að ræða mögulegar aðgerðir, enda hætta á því að grútur úr dauðu síldinni verði fugli að aldurtila.

Árleg talning vetrarfugla við norðanvert Snæfellsnes, sem er hluti af landstalningu Náttúrufræðistofnunar, fór fram í síðustu viku. Talið var á hefðbundnum talningasvæðum með ströndinni og var fuglafjöldinn hreint ótrúlegur, eins og kemur fram í samantekt Róberts A. Stefánssonar, forstöðumanns Náttúrustofu Vesturlands. Töldust 52.569 fuglar af 39 tegundum eða 64% fleiri fuglar en á síðasta ári, sem þó var metár.

Í greiningu Róberts kemur fram að mikið og fjölbreytt æti er ástæða fuglamergðarinnar – og er lifandi síld á svæðinu frá Grundarfirði og að Stykkishólmi, og dauð rotnandi síld í Kolgrafafirði helst að nefna. Eins og kunnugt er drápust 30 þúsund tonn af síld í firðinum í desember og er tekin að rotna með tilheyrandi grútarmengun.

„Í ljósi þess gríðarlega fjölda fugla sem heldur sig í nágrenni við rotnandi síldina er raunveruleg hætta á að þúsundir fugla fái grút í fiðrið, geti lent í alvarlegum vanda og í versta falli drepist á næstu vikum og mánuðum," segir Róbert.

Vegna þessa ætlar Náttúrustofa Vesturlands að kalla saman sérfræðinga til að ræða skref til að undirbúa mögulegar aðgerðir. Eins beinir Náttúrustofan því til vegfarenda um þessi svæði að hafa augun opin fyrir fuglum í vanda og tilkynna um slíkt, og skotveiðimenn eru hvattir til að nýta sér ekki tækifærið sem í fuglamergðinni felst. Fuglarnir í firðinum gegni mikilvægu hreinsunarstarfi og séu lykilþáttur til að draga úr umhverfismenguninni sem er fyrirsjáanleg.