Bæjarfulltrúar efast um verðmat Ásvalla

„Ég hef vissar áhyggjur af verðmatinu sem lagt er til grundvallar,“ sagði Helga Ingólfsdóttir, bæjarfulltrúi Sjálfstæðisflokks, á bæjarstjórnarfundi í Hafnarfirði í gær. Þar var ræddur samningur um kaup bæjarins á 20 prósenta hlut Hauka í íþróttamannvirkjum á Ásvöllum.

Samkvæmt samningnum, sem samþykktur var einróma í bæjarráði á 28. desember, eignast bærinn Haukahlutinn smám saman á 25 árum og greiðir fyrir hann 271 milljón króna á núvirði.

Geir Jónsson, fulltrúi minnihluta Sjálfstæðisflokks, sem sat bæjarráðsfundinn 28. desember sem varamaður, sagði á bæjarstjórnarfundinum í gær að ákvörðunin þá hefði verið tekin í tímapressu en hefði verið skásti kosturinn. Orðið hefði að taka trúanleg orð þeirra sem veittu bæjarráðinu upplýsingar. Enginn hefði viljað að Landsbankinn, sem er lánardrottinn Hauka, eignaðist hlut í Ásvöllum. „Það vorum við öll sammála um að væri mjög slæmur kostur í stöðunni,“ sagði Geir, sem eins og fleiri kvaðst hafa efasemdir um verðmat mannvirkjanna og bíða því nánari úttektar sem verið er að vinna.

Gunnar Axel Axelsson, formaður bæjarráðs úr Samfylkingu, undirstrikaði að ekki væri verið að færa skuldir Hauka yfir á bæjarsjóð því bærinn myndi eignast húsið fyrir sitt framlag. „Ég held að ég geti fullyrt að ekkert okkar hafi gert það með sérstakri ánægju,“ sagði Gunnar þó um samþykkt samningsins. Hann bætti við að samkomulag Hauka um afskriftir á skuldum við Landsbankann hefði „hangið á spýtunni“ því bankinn hefði gert aðkomu bæjarins að skilyrði fyrir afskriftunum.

Guðrún Ágústa Guðmundsdóttir, bæjarstjóri úr Vinstri grænum, sagði verðmatið á Ásvöllum byggja á kostnaðarverði og afskriftum. Eins og fleiri undirstrikaði Guðrún að samningurinn væri uppsegjanlegur á hverju ári og því ekki endanlegur.

Rósa Guðbjartsdóttir úr Sjálfstæðisflokki sagði við Fréttablaðið að enginn hefði verið „sérstaklega ánægður“ með að þessi staða hefði komið upp. „Eftir ýtarlega umræðu í okkar hópi var niðurstaðan sú að skynsamlegra væri að bærinn eignaðist þennan hlut með þessum hætti, en að þurfa að leigja fyrir sambærilega upphæð á hverjum mánuði,“ sagði Rósa. „Hefði þessi vandi ekki verið leystur þá hefði íþróttastarfsemi á þessu fjölmenna svæði verið sett í uppnám og þá sérstaklega íþróttakennsla.“

gar@frettabladid.is