Fyrrverandi fangavörður myndbirtir barnaníðinga

„Það verður einhver að vernda börnin, ekki gera yfirvöld það,“ segir Óskar Ingi Þorgrímsson sem er einn stofnenda netsíðu þar sem dæmdir barnaníðingar eru nafn- og myndbirtir. Óskar hefur einnig farið fyrir annarri síðu á Facebook sem starfar í sama tilgangi. Hann segir nauðsynlegt að birta myndir af dæmdum barnaníðingum.

„Við teljum okkur nú þegar vera búnir að bjarga fimm börnum frá barnaníðingum. Við fórum af stað með það markmið að bjarga einu barni. Það hefur tekist og það gerir þetta allt þess virði,“ segir Óskar Ingi.

Hann hefur ásamt fleirum haldið úti síðu á Facebook þar dæmdir barnaníðingar hafa verið nafn- og myndbirtir. Óskar segir honum hafi verið hótað líkamsmeiðingum fyrir framgöngu sína á síðunni. Hann var í síðustu viku kallaður í yfirheyrslu hjá lögreglunni í Reykjavík vegna trúnaðarbrots.

„Ég var kærður fyrir að hafa orðið til þess að barnaníðingur missti vinnuna. Ég starfaði um tíma sem fangavörður og vissi fyrir hvað þessi maður sat inni. Ég fékk svo upplýsingar um að hann starfaði sem rútubílstjóri og vissi að hann væri í kringum börn. Ég hafði samband við fyrirtækið sem hann starfaði hjá og greindi þeim frá því að hann hefði setið inni fyrir barnaníð,“ segir Óskar. Stjórnendur fyrirtækisins fóru yfir þær upplýsingar sem Óskar veitti og var maðurinn í kjölfarið leystur frá störfum.

„Það getur verið að ég hafi brotið reglur en það er borgaraleg skylda mín að greina frá þegar ég hef svona upplýsingar. Ég hefði ekki getað hugsað þá hugsun til enda að vita að manninum með aðgengi að börnum án þess að gera eitthvað í því.“

Í samtali við Vísi kveðst Óskar Ingi áfram ætla að berjast gegn dæmdum barnaníðingum.