Sverrir Ingi skrifar undir eftir helgi

Norska úrvalsdeildarfélagið Viking tilkynnti á heimasíðu sinni í dag að varnarmaðurinn Sverrir Ingi Ingason muni skrifa undir samning við félagið á mánudag.

Breiðablik tilkynnti í gær að félagið hefði komist að samkomulagi við Viking um kaupverð og Sverrir Ingi hefur nú sjálfur samið um kaup og kjör.

„Sverrir var efstur á óskalista okkar yfir varnarmenn. Hann er fyrirliði íslenska U-21 liðsins og leikmaður sem við höfum mikla trú á. Við berum mikla virðingu fyrir því sem hann gerir bæði innan vallar sem utan,“ sagði Arne Larsen Ökland, yfirmaður íþróttamála hjá Viking.

Heerenvenn í Hollandi og pólska liðið Legía frá Varsjá höfðu einnig áhuga á Sverri Inga sem valdi þó að halda til Noregs. Fyrir eru fjórir íslenskir leikmenn hjá Viking - Indriði Sigurðsson, Jón Daði Böðvarsson, Steinþór Freyr Þorsteinsson og Björn Daníel Sverrisson.