Ódýrara að leggja flugvél en einkabíl í miðborginni

Aðeins kostar nokkur þúsund krónur að leggja einkaþotu á Reykjavíkurflugvelli í tvo sólarhringa. Eftir það kostar það 680 krónur á sólarhring. Talsmaður Isavia segir gjöldin sambærileg við það sem tíðkist erlendis.

Eigendur flugvéla sem lagt er á Reykjavíkurflugvelli greiða svipað eða minna í gjöld til flugvallarins á sólarhring en ökumenn í miðborginni greiða fyrir gjaldskyld bílastæði.

Notendur flugvallarins greiða um 30 prósent af rekstrarkostnaði flugvallarins en ríkið greiðir afganginn.Þegar flugvél er lent á Reykjavíkurflugvelli greiðir eigandi hennar lendingargjald, þúsund krónur á hvert tonn, sem á einungis við um vélar sem eru þyngri en tvö tonn.

Lauslegur samanburður Fréttablaðsins á lendingargjaldi sambærilegra flugvalla sýnir að gjaldið er mun hærra í öðrum löndum og hleypur í sumum tilvikum á hundruðum þúsunda.

Að auki eru engin stæðisgjöld rukkuð á Reykjavíkurflugvelli fyrstu sex klukkutímana eftir að vél er lagt þar. Að þeim tíma loknum er rukkað eftir þyngd vélarinnar, um 1.100 krónur á hvert tonn fyrir fyrstu tvo sólarhringana og þar á eftir 680 krónur á sólarhring.

„Það er ekki langt síðan þessi gjöld voru hækkuð og þá kvörtuðu innlendir flugrekendur vegna þess að allar hækkanir hafa áhrif á farmiðagjöld þeirra,“ segir Friðþór Eydal, talsmaður Isavia, sem fer með rekstur flugvallarins.

Spurður hvort gjaldið sé ekki of lágt samanborið við til að mynda bílastæðagjöld í Reykjavík segir hann gjöldin ekki samanburðarhæf.

„Flugvallargjöld og stæðisgjöld fyrir flugvélar byggja á allt öðrum hlutum en rekstur bílastæða. Gjaldtaka á flugvöllum hér á landi tekur ekki mið af gjaldtöku bifreiðastæða heldur af gjaldtöku á öðrum flugvöllum í öðrum löndum,“ segir Friðþór.

Róbert Marshall, alþingismaður og fulltrúi Bjartrar framtíðar í umhverfis- og samgöngunefnd Alþingis, segir fyrirkomulag gjaldanna ekki koma sér á óvart.

„Þetta er eitt af þeim dæmum sem sýna að skipulagsmálum er um margt áfátt á Reykjavíkurflugvelli,“ segir Róbert.

Þorvaldur Sverrisson, íbúi í Reykjavík, vakti fyrst athygli á málinu í færslu á Facebook síðu sinni.