Vonbrigði að glæstri framtíð sé frestað um 6-8 ár

Samtök um betri byggð (BB) harma samkomulag ríkis og borgar, þar sem forsætisráðherra og þrír borgarstjórar Reykvíkinga sameinast um að hafa að engu niðurstöðu almennrar kosningar um flugvallarmálið 2001. Niðurlæging borgarbúa er fullkomnuð með aðild Icelandair Group að samkomulaginu. Samkomulagið vekur upp áleitnar spurningar um sjálfsákvörðunarrétt íslenskra sveitarfélaga og varpar skugga á sjálft lýðræðið í landinu. Þetta samkomulag er jafnómarktækt og fyrri samningar ríkis og borgar um Vatnsmýri frá 1999 og 2005 því á móti mikilli eftirgjöf borgarinnar kemur ekkert mótframlag.

Leikþáttur stjórnmálaforkólfanna

Samkomulagið hefur verið lengi í smíðum. Merki um að það væri í vændum sáust m.a. í drögum að samgönguáætlun ríkisins fyrir um tveimur árum.

Áróðursholskefla flugvallarvina og aðgerðaleysi borgaryfirvalda til að verja almannahag Reykvíkinga fellur að sérhannaðri atburðarás. Þegar BB gagnrýna nú þetta samkomulag er svarað: „Hvað gátum við annað gert, tókuð þið ekki eftir vel heppnaðri undirskriftasöfnun?“ Þannig réttlæta borgaryfirvöld afarkosti í óþörfum nauðarsamningi við ríkið. Undirskriftir í Hörpu 25. október voru því eins og lokaatriði í leikþætti stjórnmálaelítunnar. Aðalhöfundur er Dagur B. Eggertsson, sem hefur setið allt í kring um borðið á kjörtímabilinu.

Orðalag í samkomulaginu um að NS-braut flugvallarins fái að vera í Vatnsmýri til ársins 2022 skuldbindur aðeins borgina en ekki ríkið. Það táknar ekki að ríkið muni sætta sig við brottför flugvallarins þegar þar að kemur. Enda gerir ríkið það að skilyrði að staður finnist fyrir nýja miðstöð innanlandsflugs á höfuðborgarsvæðinu.

Orð Hönnu Birnu Kristjánsdóttur innanríkisráðherra í Morgunblaðsgrein nýlega styðja grun um óheilindi ríkisins: „Samkomulagið er því klárlega skref í rétta átt og áfangasigur líkt og margir hafa bent á.“ Frestun á brottför flugvallarins gengur gegn víðtækum almannahagsmunum. Alls tapa ríki og borg mörgum tugum milljarða króna því mikill þjóðhagslegur ávinningur felst í að nýta sem fyrst byggingarlandið í Vatnsmýri. Frestunin kollvarpar meginmarkmiði AR 2010-2030 um þéttingu byggðar því útþensla á höfuðborgarsvæðinu mun halda áfram nánast óheft. Fyrirheit um mannvænt, skilvirkt og menningarlegt borgarsamfélag fölna.

Misbeiting atkvæðamisvægis

Að mati samtakanna er ekki um neitt að semja við ríkið, sem tók Vatnsmýrarlandið af þeim með ólögmætum hætti 1946 og hefur hvorki greitt lóðarleigu né skaðabætur vegna gríðarlegs tjóns af flugvellinum í 67 ár. Skipulagsrétturinn er Reykvíkinga, sem kusu 2001 að flugvöllurinn færi 2016!

Frá 1946 hefur ríkið með blygðunarlausum hætti misbeitt illa fengnu valdi misvægis atkvæða til að halda Reykvíkingum og kjörnum fulltrúum þeirra við efnið í Vatnsmýrarmálinu. Afleiðingin er eitt óskilvirkasta borgarsamfélag heims. Uppsafnað tjón nemur þúsundum milljarða króna. BB benda á að borgaryfirvöld kjósa að víkja víðtækum almannahag til hliðar með þessu samkomulagi, sem er sérsniðið að þröngum og léttvægum sérhagsmunum landsmálaflokka (fjórflokksins) og að pólitískum einkahagsmunum helstu persóna og leikenda á sviði stjórnmálanna.

Markmið í 1. gr. Skipulagslaga 2010 ná ekki fram að ganga, að sjálfbær þróun, hagur heildarinnar, efnahagslegar, félagslegar og menningarlegar þarfir borgarbúa, heilbrigði þeirra og öryggi verði höfð að leiðarljósi.