Jafn mikið fjöregg og Harpan í Reykjavík

Mikil gróska hefur orðið í ferðaþjónustu á sunnanverðum Vestfjörðum samhliða opnun 40 herbergja hótels á Patreksfirði í júníbyrjun, segja Ásthildur Sturludóttir, bæjarstjóri Vesturbyggðar, og Jóhann Svavarsson, framkvæmdastjóri ferðaþjónustufyrirtækisins Westfjords Adventures.

Fyrir eru fjögur gistiheimili á Patreksfirði sem samanlagt eru með 32 herbergi, segir Díana Jóhannsdóttir, markaðsfulltrúi Fjórðungssambands Vestfirðinga. Þar að auki eru mun fleiri gistiheimili á sunnanverðum Vestfjörðum en þetta er í fyrsta sinn sem svo stór hótel er starfrækt á svæðinu.

„Ég segi stundum í gríni en samt sem áður í alvöru að opnun hótelsins á Patreksfirði hafi álíka áhrif hér og tilkoma Hörpunnar fyrir Reykjavík,“ segir Ásthildur. „Hótelið er hafnarmannvirki ferðaþjónustunnar á svæðinu og styður alla þá uppbyggingu sem hér er að verða og eflir samfélagið á allan hátt.“

Jóhann var áður með lítið fjölskyldufyrirtæki sem sérhæfði sig í leiðsögn með gönguhópa um sunnanverða Vestfirði. En með tilkomu hótelsins opnuðust frekari tækifæri svo hann kom ásamt fleirum Westfjord Adventures á koppinn.

„Það er alveg ljóst að fólk er ekki að koma til Patreksfjarðar bara til að gista, það kemur til að gera eitthvað,“ segir hann. „Og við sköpum valkostina og bjóðum því upp á rútuferðir með leiðsögumönnum, við sækjum okkar fólk á flugvöllinn á Bíldudal, við erum með umboð fyrir Bílaleigu Akureyrar, við erum auðvitað enn þá með gönguferðir um nánast alla sunnanverða Vestfirði og svo hjólaferðir, hjólaleigu, jeppaferðir, bátsferðir og svo starfrækjum við upplýsingamiðstöð fyrir svæðið. Þetta er náttúrulega ekki gert nema með því að fara út í miklar fjárfestingar.“

Jóhann segir að auk sín séu þrír fastráðnir starfsmenn hjá fyrirtækinu.

Davíð Torfi Ólafsson, framkvæmdastjóri Fosshótela, segir að nýtingin á nýja hótelinu á Patreksfirði hafi verið betri en hann hafði búist við. „Ég segi ekki að þetta hafi komið okkur á óvart, við höfum auðvitað trú á svæðinu,“ segir Davíð Torfi. „En það er ekki sjálfgefið að þetta fari svona fyrsta sumarið.“

Ekki er þó öll nýja flóran í ferðamennskunni sett á reikning hótelsins en hnúfubakar hafa síðustu ár vanið komu sína á sunnanverða Vestfirði svo hægt er orðið að bjóða upp á hvalaskoðun á svæðinu sem er nýlunda.