Allt útlit er fyrir að Óttar Magnús Karlsson, sextán ára leikmaður Víkings í Reykjavík, verði innan skamms liðsfélagi Kolbeins Sigþórssonar hjá Ajax.
Þetta kom fram í hollenskum fjölmiðlum í morgun. Jerry King, umboðsmaður hans, sagði að Óttar hefði fengið samningstilboð frá Ajax til næstu þriggja ára.
Óttar Magnús, sem hefur spilað með Víkingum á undirbúningstímabilinu, er lýst sem stórum og stæðilegum sóknarmanni sem býr samt yfir góðum hraða og hreyfigetu.
Hann hefur tvívegis haldið utan til Hollands í vetur og æft með Ajax. Hann var ytra í vikunni og átti til að mynda fund með Marc Overmars.
