Framtíð náttúrusýningar í Perlunni í höndum Alþingis

Stofnframlag ríkisins að upphæð 400 milljónir króna til að setja upp grunnsýningu Náttúruminjasafns Íslands (NMSÍ) í Perlunni er fellt niður í frumvarpi til fjárlaga næsta árs. Ráðherra segir framhald málsins ráðast af því hvort Alþingi staðfestir leigusamning ríkis og borgar á Perlunni.

„Þetta er virkilega slæmt fyrir starfsemina. Ég átti allt eins von á því að stofnframlagið yrði lækkað, en að það skuli vera fellt niður alfarið kemur mér á óvart. Framlag fjárlaganna dugar síðan rétt fyrir einn mann á skrifstofu. Þetta er hneisa fyrir eitt af þrem höfuðsöfnum landsins,“ segir Hilmar J. Malmquist, forstöðumaður Náttúruminjasafnsins.

Uppbygging grunnsýningar NMSÍ í Perlunni var liður í fjárfestingaráætlun ríkisstjórnar Jóhönnu Sigurðardóttur og var búið að eyrnamerkja 500 milljónir [400 árið 2013; 100 árið 2014] til að setja sýninguna upp. Í mars undirrituðu ríki og borg samning um leigu á aðstöðu í Perlunni undir sýninguna að upphæð 80 milljónir á ári. Fyrstu áætlanir gerðu ráð fyrir að sýningin yrði opnuð á hausti komanda.

Illugi Gunnarsson, mennta- og menningarmálaráðherra, segir málið hvíla á leigusamninginn. Hann komi til kasta þingsins við gerð fjáraukalaga. „Ef hann verður samþykktur taka menn ákvörðun um uppbyggingu sýningar og hraða hennar,“ segir Illugi.

Spurður um afstöðu til þess að sýningin verði byggð upp eins og fyrirhugað var, sérstaklega í ljósi andstöðu við verkefnið frá þingmönnum Sjálfstæðisflokksins, segist Illugi vera í þeim hópi sem vilji sjá rísa gott náttúruminjasafn. „Það er svo annað mál hvenær það verður og hvernig verður að því staðið. Við stöndum frammi fyrir þröngri stöðu í ríkisfjármálunum. En þetta snýst fyrst og síðast um vilja þingsins,“ segir Illugi.

Dagur B. Eggertsson, formaður borgarráðs, segir þýðingu þessarar ákvörðunar stjórnvalda til skoðunar hjá borginni. „Við höfum ekki skilið það þannig að ekki sé áhugi á að setja upp myndarlega náttúrusýningu í Perlunni. Hins vegar væri hik á fjármögnuninni og verkefnið gæti tafist. Við verðum að fá þá mynd skýrða.“

Hilmar vill ekki meina að þessi aðgerð stjórnvalda útiloki sýningarhald í Perlunni með öllu. Mun ódýrari leiðir hafi þegar verið kynntar stjórnvöldum. „Ég vil ekki trúa því að ráðherra hafi blásið þetta allt út af borðinu. Það er hægt að efna til sýningar, t.d. að koma upp steypireyðarbeinagrindinni og kannski geirfuglinum til viðbótar. Það þarf ekki mikið til að koma þessu höfuðsafni aðeins í gang,“ segir Hilmar.