Skrautleg hjólreiðakeppni

Hjólreiðakeppnin „KexReið“ var haldin í fyrsta sinn í Skuggahverfinu í gær. 85 manns í skrautlegum hjólagöllum tóku þátt og veðrið lék við keppendur.

KexReiðin er framkvæmd af Kex Hosteli í samstarfi við Kría Cycles. Tilgangur hennar er að styðja við sívaxandi hjólreiðamenningu í borginni og auðga mannlíf í Skuggahverfinu um leið. Stefnt er á að gera Kexreiðina að árlegum viðburði héðan í frá.

Keppendur hjóluðu ýmist 15 eða 30 kílómetra braut sem lá um Skúlagötu og Hverfisgötu. Verðlaun voru veitt í ýmsum flokkum, en aðallega var keppt um verðlaunatreyju Kexreiðarinnar sem hönnuð var af Guðmundi Jörundssyni hjá JÖR. Þá voru sigurvegararnir verðlaunaðir með úttektum í hjólabúðirnar Kría Cycles og Berlín, og gjafabréfum á veitingastaðina Dill og Sæmund í sparifötunum.

Að keppni lokinni dönsuðu þáttakendur við ljúfa tóna hljómsveita sem komu fram á útisviði í Vitagarðinum.