Læknar ávísa hreyfingu í stað lyfja

Sjúklingar geta nú átt von á að læknar skrifi upp á hreyfiseðla í stað hefðbundinna lyfseðla. Markmiðið er að efla úrræði gegn lífsstílssjúkdómum en þeir orsaka tvo þriðju af öllum dauðsföllum á Íslandi í dag.

Hreyfiseðlarnir eru byltingarkennd nýjung sem rutt hefur sér til rúms innan heilbrigðiskerfisins á Norðurlöndunum og SÍBS hefur forgöngu um að innleiða á Íslandi. Guðmundur Löve, framkvæmdastjóri SÍBS, segir hreyfiseðlana viðbrögð við lífsstílssjúkdómum. „Það er nú þannig í dag að það eru fleiri sem tapa heilsu vegna velmegunar en sjúkdóma.“

Um er að ræða tveggja ára tilraunaverkefni í samstarfi við velferðarráðuneytið. Auður Ólafsdóttir, sjúkraþjálfari, segir verkefnið byggja á að læknar skrifi út svokallaðan hreyfiseðil fyrir sjúklinga sem þeir telja að hafi meira gagn af hreyfingu en til að mynda lyfjagjöf. „Samhæfingaraðili tekur svo þessa tilvísun og býr til hreyfiúrræði fyrir viðkomandi og það er einstaklingsbundið, magn, ákefð og tími. Svo fylgjum við honum eftir í gegnum ákveðið tölvukerfi sem hann þarf að skrá sig inn í.“

Hreyfingin tekur mið af áhugasviði hvers og eins en sjúklingar þurfa sjálfir að bera kostnað af henni. „Þetta er ekki komið undir tryggingakerfið eins og staðan er í dag frekar en megnið af lyfjakostnaði,“ segir Guðmundur.

Hann segir hreyfiseðlana þegar hafa gefið góða raun og Auður tekur undir. „Fólk er tilbúið að prófa nýjan valkost til að bæta sína heilsu. Almennt finnst mér fólk mjög jákvætt, það vill nota hreyfingu sem bót við sínum meinum.“