Segir hugmynd um reykingabann allt of víðtæka

„Ég er ekki ósammála því að skoða það að reykingar verði bannaðar í kringum opinberar stofnanir," segir Ármann Kr. Ólafsson, bæjarstjóri Kópavogs, spurður út í tillögu Framsóknarmannsins Ómars Stefánssonar, sem hann lagði fram á bæjarráðsfundi í gær.

Tillagan hefur vakið nokkra athygli, en þar leggur Ómar til þess að bæjarritara verði falið að skoða hvort hægt sé að setja í lögreglusamþykkt Kópavogsbæjar bann við reykingum utanhúss við stofnanir í Kópavogi, svo sem heilsugæslu, söfn og sundlaugar.

Ómar gengur þó skrefinu lengra og segir: „Jafnframt að athuga hvort möguleiki er á að banna alfarið reykingar í landi Kópavogs."

Ármann, oddviti Sjálfstæðisflokksins í Kópavogi, sem er í meirihluta í bæjarstjórn, segir hugmyndina um bann við reykingar í kringum opinberar stofnanir, sérstaklega þar sem börn stunda íþróttir eða aðra heilsutengda starfsemi, álitlega og nokkuð sem megi skoða.

„En í mínum huga er hitt allt of víðtækt," segir Ármann um hugmyndir Ómars um að banna reykingar alfarið á landi Kópavogsbæjar.