Hagkaup tók umdeilda peysu úr umferð

„Ef viðskiptavinur bendir okkur á svona lagað þá förum við bara eftir því, enda er ekki okkar tilgangur að særa blygðunarkennd viðskiptavina okkar," segir Gunna Ingi Sigurðsson, framkvæmdastjóri Hagkaups, en fyrirtækið tók umdeilda peysu úr sölu eftir að fyrirtækinu bárust ábendingar frá viðskiptavinum.

Eins og sjá má á myndinni sem fylgir fréttinni, og er fengin að láni á Facebook-síðu Auðar Kristínar sem vakti fyrst athygli á málinu, þá prýðir peysan fáklædda stúlku með áfengisflösku í klofinu.

Myndin hefur vakið gríðarlega athygli á samskiptavefnum og margir hneykslast vegna þess að hún er til sölu. Gunnar Ingi segir að innkaupastjóri verslunarinnar hafi ekki ákveðið sérstaklega að kaupa inn og selja þessa peysu.

„þetta kemur í heildarsendingu sem við pöntum að utan. Þetta eru oft vörur sem eru merktar einfaldlega bolir með myndum á en engin sýnishorn fylgja þessu," útskýrir Gunnar. Spurður hvort þeir séu sammála um að umrædd mynd sé of gróf svarar Gunnar Ingi því að svo hafi verið.

Hann segir að verslunin hafi áður brugðist við vegna svona mistaka, þó ekki með föt.

„Við fáum stundum ábendingu varðandi texta og annað eins," segir Gunnar Ingi sem vonar að enginn erfi þessi mistök við fyrirtækið.