Fæddist með rófu

Kesha fæddist með lítið, útstætt bein á neðri hluta baksins.

Söngkonan, sem þykir heldur sérvitur, greindi frá fæðingargallanum í viðtali við tímaritið Heat. "Ég var með rófu þegar ég fæddist. Hún var lítil, rétt rúmlega hálfur sentimetri, en læknarnir skáru hana af og stálu rófunni minni. Mér finnst þetta sorgleg saga."

Hin 26 ára gamla söngkona segist elska að opna sig fyrir aðdáendum sínum.

Hún framleiddi sinn eigin raunveruleikaþátt sem hún kallaði "Ke$ha: My Crazy, Beautiful Life" og gaf áhorfendum færi á því að sjá hina raunverulegu Keshu. "Það var rosalega gaman því þá gátu aðdáendur mínir séð hvernig ég er í daglegu lífi miðað við framkomu mína á sviði."

Í einum þættinum ákvað söngkonan að drekka eigið þvag. "Pissið mitt er ekki svo slæmt, það bragðaðist í raun eins og sælgæti."