Sannkölluð síldarstemning

Sannkölluð síldarstemning myndaðist í fjörunni í Kolgrafafirði í morgun þegar hópur ungmenna mætti þar til að tína dauða síld upp í kör. Þau náðu að fylla fimmtíu og eitt kar á tveimur tímum og sást varla högg á vatni.

Krakkarnir náðu að tína um 30 tonn fyrir Skinnfisk í Sandgerði sem mun vinna síldina í loðdýrafóður til útflutnings. Þau fá átta krónur fyrir kílóið og voru því komin með digran sjóð eftir morguninn.

Krökkunum sem fréttastofa ræddi við fannst gaman að tína síldina og vinnan ekkert ógeðsleg, þau segja lyktina hafa verið bærilega og ekki hafi verið verra að sleppa við skólann.

Síld drapst fyrst í Kolgrafafirði um miðjan desember. Guðrún Lilja Arnarsdóttir bóndi á Eiði segir að hún hafi ekki trúað sínum eigin augum þegar önnur holskefla af dauðri síld barst í fjöruna fyrir neðan bæinn í lok síðustu viku.

Það mætti segja að Grundarfjörður hafi breyst í hálfgerðan síldarbæ. Björn Steinar Pálmason bæjarstóri í Grundarfirði segir að það hafi verið frábært að fá krakkana í skólanum til að bjarga verðmætunum og koma í veg fyrir meiri mengun en er orðin.

Grunnskólakrakkar voru ekki þeir einu sem tíndu upp síld úr fjörunni í morgun, þar voru líka staddir hestamenn úr uppsveitum Árnessýslu að ná í góðgæti í bústofninn. Þeir höfðu saltað um fjögur tonn af síld sem á að duga um 150 hrossum út veturinn.

Rætt var við Guðrúnu Lilju, Björn Steinar og grunnskólakrakka í fjörunni í fréttatíma Stöðvar 2 í kvöld. Fréttina má sjá í spilaranum hér fyrir ofan.