Styðja kollega sína sunnan heiða

„Hjúkrunarfræðingar á Sjúkrahúsinu á Akureyri (FSA) fagna samþykkt ríkisstjórnar Íslands frá 22. janúar 2013 um að ráðist skuli nú þegar í jafnlaunaátak sem beinist að því að rétta hlut starfstétta þar sem konur eru í miklum meirihluta."

Þetta kemur fram í stuðningsyfirlýsingu sem samþykkt var á fundi hjúkrunarfræðinga starfandi við Sjúkrahúsið á Akureyri í dag.

„Hinn kynbundni og ráðuneytabundni launamunur sem fjármála- og efnahagsráðherra og velferðarráðherra hafa viðurkennt að hafi viðgengist gagnvart hjúkrunarfræðingum í fjölda mörg ár er óásættanlegur. Við viljum sjá raunhæfar aðgerðir fylgja þessum orðum og að laun hjúkrunarfræðinga verði leiðrétt í miðlægum kjarasamningum til jafns við aðra ríkisstarfsmenn með sambærilega menntun," segir í yfirlýsingunni.

Hjúkrunarfræðingar norðan heiða styðja við bakið á kollegum sínum á Landspítalanum.

„Við lýsum yfir eindregnum stuðningi við hjúkrunarfræðinga Landspítala Háskólasjúkrahúss og hvetjum til þess að strax verði gengið frá stofnanasamningi við þá. Í kjölfarið verði gengið frá sambærilegum stofnanasamningum á öðrum heilbrigðisstofnunum."