Hjúkrunarfræðingum stendur 30 þúsund króna launahækkun til boða

Þær launahækkanir sem hjúkrunarfræðingum býðst með endurnýjun stofnanasamnings leggja sig á um 30 þúsund krónur á mánuði að jafnaði. Fjögurhundruð milljón króna viðbótarframlag frá ríkinu skiptist á um 1.000 stöðugildi hjá Landsspítalanum.

Að auki fá hjúkrunarfræðingar afturvirka álagsgreiðslu vegna nóvember, desember og janúar, sem kemur út eins og 90 þúsund króna eingreiðsla um næstu mánaðamót. Það er því ljóst að verið er að bjóða hjúkrunarfræðingum umtalsvert meiri kjarabætur en tóku gildi um síðustu mánaðamót á almennum vinnumarkaði, þegar laun hækkuðu um 3,25 prósent.

Hjúkrunarfræðingarnir fá einnig þá hækkun auk fyrrgreindrar hækkunar sem metin er á um 4,2 prósent. Laun þeirra eru að hækka um 7,45 % auk 90 þúsund króna eingreiðslunnar. Vilhjálmur Birgisson, formaður Verkalýðsfélags Akraness, segir að mistök hafi verið gerð við síðustu kjarasamninga. Samið hafi verið um samræmda launastefnu óháð getu einstakra atvinnugreina. Nú fái hjúkrunafræðingar verulega launahækkun sem hljóti að vera haft til hliðsjónar við gerð nýrra kjarasamninga næsta haust.

Athugasemd 5. febrúar kl. 11:30

Ekki eru allir sem fá 90 þúsund króna eingreiðslu en Björn Zoega, forstjóri Landspítalans, segir að samtals séu þetta um 1350 einstaklingar í 1020 stöðugildum, sem starfi hjá Landspítalanum. Flestir fái 90 þúsund króna greiðslu. Innan við tvö hundruð manns raðist í launaflokka sem fái lægri upphæð.

Glærusýning sem starfsmannastjóri Landspítalans kynnti deildarstjórum á fundi fylgir hér að neðan.