91% hjúkrunarfræðinga sagði nei

Um 600 manns sóttu fund hjúkrunarfræðinga á Grand Hótel í kvöld þar sem kynnt var tilboð Landspítalans um nýjan stofnanasamning. Um 91 prósent gesta greiddu atkvæði gegn því að gengið yrði að tilboðinu.

„Eftir umræður á fundinum áttaði maður sig á því hvernig þetta lá. Þetta var afdráttarlaust og það er auðvitað mjög gott fyrir þá sem sitja í nefndinni að fá svona afdráttarlausa ráðgjöf. Þá er auðveldara að vita hvað hópurinn vill," sagði Elsa B. Friðfinnsdóttir, formaður félags hjúkrunarfræðinga, við fréttastofu í kvöld.

Fundargestir voru spurðir að því á fundinum hvort þeir vildu að samstarfsnefndin/fulltrúar hjúkrunarfræðinga skrifuðu undir tilboð Landspítalans.

„Það tóku 497 þátt í þessari könnun okkar okkar og það voru 452 sem sögðu nei eða 91%," segir Elsa. Hún segirmætinguna hafa komið sér skemmtilega á óvart.

„Þegar mest var voru um 600 manns. Það er náttúrulega mjög hátt þegar hópurinn telur 1348 og það eru náttúrulega einhver hundruð hjúkrunarfræðinga að vinna sem komust ekki," segir Elsa og telur skilaboðin skýr.

„Mætingin ein og sér sýnir hversu miklu máli þetta skiptir hjúkrunarfræðinga," segir Elsa. Boðað hefur verið til fundar með fulltrúum Landspítalans á morgun klukkan 13.