Fyrsta ljósmyndin úr byssumynd Baltasars

Universal hefur afhjúpað fyrstu ljósmyndina úr kvikmyndinni 2 Guns, sem er næsta leikstjórnarverkefni Baltasars Kormáks.

Myndin, sem frumsýnd verður næsta sumar, skartar þeim Mark Wahlberg og Denzel Washington í hlutverkum leynilögreglumanna sem berjast við stórhættulegan eiturlyfjahring, en þeim til halds og trausts í myndinni eru leikararnir Bill Paxton, Fred Ward, Paula Patton og Edward James Olmos.

2 Guns er annað samstarfsverkefni Baltasars og Wahlberg, en í fyrra gerðu þeir myndina Contraband, sem gerði góða hluti í kvikmyndahúsum vestra.