Dómurinn mikilvægt lóð á vogarskálarnar

Már Guðmundsson seðlabankastjóri segir alveg ljóst að niðurstaða EFTA dómstólsins í Icesave-málinu hafi jákvæð áhrif á losun fjármagnshafta. „Það er ekki hægt að segja nákvæmlega hver þau eru eða hversu mikil," segir hann. Það hafi verið orðið ljóst að hin fjárhagslega áhætta sem tengdist Icesavemálinu hafði minnkað verulega þegar ljóst varð hversu góðar heimturnar urðu úr þrotabúi Landsbankans. „Og það hafði að einhverju leyti þegar endurspeglast í lánshæfismatinu og viðurkennt af lánshæfismatsfyrirtækjum. En það er alveg ljóst að þetta hefur jákvæð áhrif á möguleika þessarar losunar," segir hann.

Már segir ekki víst að lánshæfismatið muni hækka strax vegna Icesave-málsins. „En þar sem horfur eru neikvæðar þá kannski verða þær stöðugar. Og stöðugar horfur verða kannski jákvæðar og það hefur allt áhrif og við skynjum strax jákvæð áhrif," segir Már.

Hann segir hins vegar að aðrir þættir skipti meira máli um losun fjármagnshafta. Til dæmis hvernig tekið verður á greiðslum úr þrotabúum, hvaða skilyrðum nauðasamningar verða bundnir og fleira. Almennt ástand á fjármagnsmörkuðum hér innanlands og erlendis skipti líka miklu máli, sem og efnahagsástand hér innanlands og erlendis.

Már bendir á mikilvægi þess að ríkissjóður verði hallalaus árið 2014 þegar fer að reyna á losun fjármagnshaftanna. „Vegna þess að þegar höftin byrja að fara þá munu innlendir vextir hækka, allavega um hríð, og þá verður fjármögnun ríkissjóðs á innlendum markaði erfiðari," segir hann. Þess vegna sé mikilvægt að sem minnst þurfi að fjármagna ríkissjóð á þessum tíma. Fyrrgreind atriði hafi miklu meiri áhrif á losun hafta en Icesave-málið. „En þetta er hins vegar lóð á vogarskálarnar," segir hann.