Nova ríður á vaðið með 4G-þjónustu

Nova hóf í gær, á fjórða degi fjórða mánaðar ársins, að bjóða upp á svokallaða 4G-netþjónustu, fyrst fjarskiptafyrirtækja.

Þetta gerist daginn eftir að Nova fékk formlega úthlutað rekstrarleyfi fyrir 4G-þjónustuna, þráðlausa háhraða nettengingu sem styður yfir 100 megabæta hraða á sekúndu.

Liv Bergþórsdóttir, forstjóri Nova, segir þjónustuna á sama verði og 3G-þjónustan hefur verið hingað til. „Við erum mjög stolt af því að geta boðið upp á þetta svona snemma,“ segir Liv.

Þrjú önnur fyrirtæki fengu úthlutað leyfi til rekstrar 4G-kerfis, Vodafone, Síminn og 365.

Gunnhildur Arna Gunnarsdóttir, upplýsingafulltrúi Símans, segir að þar verði slíkt kerfi tekið í gagnið þegar líði á árið. „Auk þess verður hraðinn um 3G-kerfið tvíefldur strax í sumar. Það þýðir að hann nær 42 Mb/s og því svipaður 4G-hraðanum. Ástæða þess að við hjá Símanum eflum 3G áfram þrátt fyrir tilkomu 4G-tækninnar er að enn sem komið er styðja fá símtæki og tölvur 4G-tæknina,“ segir hún.

Hrannar Pétursson, talsmaður Vodafone, segir að þar sé stefnt að því að fara af stað með 4G í sumar.

„Það liggur ekki fyrir tímasetning á 4G-þjónustunni okkar – sú uppbygging hefur ekki farið fram,“ segir Ari Edwald, forstjóri 365. „Sú þjónusta sem við komum með fljótlega mun byggja á þeim dreifikerfum sem fyrir eru.“- sh