Ætla ekki að breyta listamannalaunum

Jóhannes Þór Skúlason aðstoðarmaður forsætisráðherra segir aðspurður að misskilnings gætti um fyrirætlanir Framsóknarflokksins með starfslaun listamanna frá hinu opinbera. Hann segir það ekki rétt að Framsóknarflokkurinn hyggist beita sér fyrir því að núverandi fyrirkomulagi verði breytt.

Vigdís Hauksdóttir sagði á beinni línu á DV nú fyrir skemmstu að „stefna flokksins er að afnema listamannalaun í þeirri mynd sem þau eru og velja og styrkja í staðinn unga efnilega listamenn."

Fréttastofa hafði samband við Jóhannes til að kanna hvort til stæði að afnema eða breyta listamannalaununum. „Það stendur ekki til og er ekki stefna Framsóknarflokksins. Það sem Vigdís er að tala um eru heiðurslaun listamanna en ekki  starfslaunin. Það er ekki rétt sem haldið er fram að til standi að gera breytingar á þeim."

Heiðurslaun ekki best, betra að styrkja unga listamenn

Í ályktun 32. flokksþings Framsóknarflokksins segir að „Framsóknarflokkurinn lítur svo á að heiðurslaun listamanna séu ekki besta leiðin til að stuðla að grósku í íslensk listalífi. Framsóknarflokkurinn leggur til að heiðurslaun listamanna verði

lögð niður í núverandi mynd og að það fjármagn sem sparast verði notað í sérstök starfslaun fyrir unga listamenn."

Eins og fram kom í fréttum Vísis í gær eru listamenn „reiðir og hræddir" vegna ummæla Vigdísar. Kristín Steinsdóttir formaður Rithöfundasambandsins segir að hún muni eiga fund með menntamálaráðherra vegna ummælanna.