Drullastu-átakinu lýkur á mánudag

Verkefninu Drullastu til að leggja góðu málefni lið lýkur eftir helgi og hefur það vakið mikla athygli.

Gerður var fjöldi myndbanda þar sem þekktir Íslendingar létu henda yfir sig drullu til að styðja við gott málefni. Voru myndböndin sýnd hér á Vísi og skiptu áhorfin á þau tugum þúsunda.

Á mánudaginn verður svo úr um það skorið hvernig milljón króna góðgerðarsjóðurinn skiptist milli fjögurra góðgerðarfélaga. Það fara því að verða síðustu forvöð að taka þátt. Peningarnir verða svo afhentir á föstudag.

Nýafstaðinn Mýrarbolti var hluti af átakinu og í meðfylgjandi myndbandi má sjá hressilegar svipmyndir úr þessum blauta og drulluga bolta.