"Þetta er ljótur heimur sem við lifum í"

Tveir menn voru úrskurðaðir í gæsluvarðhald seinni partinn í dag, vegna árásar sem gerð var á eldri mann á heimili hans í Grafarvogi í gær. Maðurinn var bundinn og honum ógnað með hnífi og hann segist enn vera að ná áttum eftir atburðinn.

„Þetta er ljótur heimur sem við lifum í," sagði maðurinn í samtali við fréttastofu í dag. Hann segir að árásarmennirnir hafi komið sér algjörlega í opna skjöldu og að fjölskyldan sé enn að átta sig á að þetta hafi gerst.

Það var upp úr klukkan ellefu í gærmorgun sem tveir menn ruddust inn í íbúðina, bundu húsráðanda sem er maður á sjötugsaldri, á höndum og fótum, og ógnuðu honum með hnífi. Þeir stálu síðan miklu magni af skotvopnum sem maðurinn hafði löglega í sínum fórum.

 Mennirnir athöfnuðu sig í um hálfa klukkustund og héldu svo á brott. Þriðji maðurinn beið þeirra í bíl fyrir utan og þegar þeir keyrðu af vettvangi náðu vitni að sjá af hvaða tegund bílinn var. Eftir atburðinn gat húsráðandi gert vart við sig hjá nágranna og fengið hjálp. Hann segir að mennirnir hafi hulið andlit sín með húfum en telur sig ekki þekkja þá persónulega.

Manninum var mjög brugðið og farið var með hann á slysadeild til skoðunar og aðhlynningar, en meiðsli hans eru ekki alvarleg.

Um kvöldmatarleytið í gærkvöldi var gerð húsleit í húsi í Hlíðahverfinu í Hafnarfirði og þar fundust stolnu skotvopnin vandlega falin. Mennirnir tóku bæði skotfæri og átta skotvopn, riffla, haglabyssur og kindabyssu.

Lögreglan lítur málið mjög alvarlegum augum og var sérsveit ríkislögreglustjóra kölluð til. Árásarmennirnir hafa tengsl við vélhjólasamtök sem stunda skipulagða glæpastarfsemi en ekki er hægt að segja til um hvort málið tengist uppgjöri sem átt hefur sér stað í undirheimunum undanfarið.

Tveir menn voru svo leiddir fyrir dómara í Héraðsdómi Reykjavíkur í dag og úrskurðaðir í gæsluvaðhdl. Þeir eru báðir á þrítugsaldri og verða þeir í haldi til 10. júní á grundvelli rannsóknarhagsmuna.

Málið er rannsakað sem rán og varðar brot af þessu tagi að lágmarki sex mánaða fangelsi en að hámarki tíu ára samkvæmt hegningarlögum.