Hjartagarðurinn verður opinn í sumar

Allt bendir til þess að framkvæmdir sem fyrirhugaðar voru á Hljómalindarreit í sumarbyrjun færist fram í ágúst. Hjartagarðurinn verður því opinn í sumar. Þessu greindi  Jakob Frímann Magnússon, miðborgarstjóri, frá á Facebook síðu sinni fyrr í dag.

Jakob segir fréttirnar mjög ánægjulegar.

„Þetta er bara frábært fyrir alla sem unna hinni frjálsu veggjalist. Þetta er hið bóhemska og frjálslega umhverfi í miðri háborg," segir hann.

Hjartagarðurinn setti skemmtilegan lit á miðbæinn síðasta sumar, enda virkt og fjölskrúðugt mannlíf á reitnum. Þar er skrautlegt vegglistagallerí til margra ára, svið og hjólabrettapallar svo fátt eitt sé nefnt. Fjölmargir hafa tekið ástfóstri við garðinn og því eflaust gleðifréttir fyrir marga að fá að njóta hans aðeins lengur en útlit var fyrir.