Fólk veikt vegna myglusvepps á LSH

Mögulega þarf að seinka ákveðnum breytingum sem fyrirhugaðar voru á húsnæði Landspítalans til að bregðast við myglusveppi sem upp er kominn við leka glugga í elsta hluta spítalans. Myglusveppurinn greindist í desember síðastliðnum eftir að hópur starfsmanna á þriðju hæð í eldri byggingu spítalans kvartaði undan ofnæmiseinkennum í öndunarvegi.

Sex starfsmenn Landspítalans hafa fundið fyrir óþægindum vegna myglusveppsins sem greinst hefur á einni hæð í eldri byggingu spítalans. Skipt verður um þá glugga sem hafa lekið í sumar og starfsmenn fluttir annað á meðan.

„Við rekum hér sjúkrahúsþjónustu í húsi sem byggt er upp úr 1920 og hannað eitthvað fyrr og margbúið að laga,“ bendir Björn Zoëga, forstjóri Landspítalans, á. „Við verðum bara að halda lagfæringum áfram þangað til við fáum betri aðstöðu.“

Björn segir vitað um þessi svæði og fleiri þar sem hætt sé við viðlíka vandamálum. „Því þetta er töluverður fjöldi af byggingum sem við erum með og tiltölulega lítið fé sett í viðhald.“

Aukinn kostnaður vegna viðhalds hefur hins vegar ekki áhrif á áætlun spítalans um tækjakaup. „Þau eru á sérlið á fjárlögum undir því sem kallast meiriháttar fjárfestingar. Við verðum bara að seinka ákveðnum breytingum á húsnæði og reyna að finna fé til að laga þetta. Og það verður bara svona plástur, eins og venjulega,“ segir Björn.

Ingólfur Þórisson, framkvæmdastjóri rekstrarsviðs LSH, segir að klæðningin í húsinu sé úr lífrænum efnum svo sem korki og timbri sem byrji að fúna ef raki kemst í hana. Myglusveppurinn hefur greinst í um sjö herbergjum þar sem læknar hafa skrifstofu og hvíldaraðstöðu en um sex starfsmenn höfðu kvartað undan óþægindum. Þeir verða fluttir annað þangað til búið er að hreinsa upp sveppinn.

Gjörgæsludeild spítalans er á hæðinni fyrir neðan staðinn sem myglusveppurinn greindist. Ingólfur segir að húsnæðið henti ekki viðkvæmri starfsemi „en sem betur fer hefur þetta ekki greinst nema á þessari skrifstofuhæð.“