Myndefnið óljóst og krafðist ítarlegrar skoðunar

Myndefni, sem lögreglunni á höfuðborgarsvæðinu barst rétt fyrir jól, þar sem Karl Vignir Þorsteinsson viðurkennir kynferðisbrot voru óljós og kröfðust ítarlegrar skoðunar. Þetta kemur fram í yfirlýsingu sem lögreglan sendi frá sér í hádeginu. Með yfirlýsingunni bregst lögreglan við gagnrýni sem kom fram í Kastljósi Ríkissjónvarpsins í gær. Í yfirlýsingunni kemur fram að lögreglan sótti gögnin til RÚV fimmtudaginn 20. desember. Efnið hafi verið óklippt og tekið nokkurn tíma að yfirfara það allt, en það var að mestu gert á milli jóla og nýárs.

„Gögnin, en ætla má að upptökurnar hafi verið nokkurra vikna gamlar þegar þær bárust lögreglu, voru um margt óljós um hvað var verið að játa, á hvaða tíma brot voru framin og gegn hverjum sem og að hve miklu leyti um var að ræða brot sem maðurinn hafði þegar verið sakfelldur fyrir. Lögreglan þurfti því að fara vandlega yfir málið, m.a. með tilliti til þess hvort brot voru fyrnd og undirbúa sínar aðgerðir. Þeirri vinnu var ekki lokið þegar umfjöllun um málið hófst á opinberum vettvangi," segir í yfirlýsingunni.

Eftir sýningu áðurnefnds sjónvarpsþáttar hafi lögreglu hins vegar borist nýjar upplýsingar sem kölluðu á skjót viðbrögð lögreglu. Um hafi verið að ræða kærur vegna brota sem séu hugsanlega ófyrnd. Á grundvelli þessara nýju upplýsinga og kæra var Karl Vignir úrskurðaður í tveggja vikna gæsluvarðhald í gær.



Viðbót klukkan 13:55

Kastljós sendi frá sér yfirlýsingu í dag þar sem brugðist er við yfirlýsingu lögreglunnar. Hún er svohljóðandi:

Vegna fréttatilkynningar lögreglu frá því í morgun vill ritstjórn Kastljóss taka fram að umsjónarmenn þáttarins tilkynntu yfirmanni kynferðisbrotadeildar um upptökur Kastljóss og efni þeirra 14. desember sl. Strax þá var lögreglu gerð grein fyrir því að þar væri að finna játningar Karls Vignis á nýlegum kynferðisbrotum auk játninga hans á eldri brotum gegn á þriðja tug barna á 50 ára tímabili. Meðal annars gegn nafngreindum einstaklingum. Þá þegar bauðst lögreglu að skoða efnið.

Efnið sem Kastljós afhenti lögreglu var tekið upp í tvennu lagi: Annars vegar 29. nóvember, þar sem Karl Vignir ræðir eingöngu um eldri brot sín. Hins vegar 12. desember, þar sem Karl er spurður mun ítarlegar út í brotaferil sinn auk þess sem hann gengst við því að hafa brotið af sér eftir árið 2007. Í seinni upptökunni fékkst því mun gleggri mynd af brotum sem hann hafði ekki áður játað. Strax og umsjónarmenn Kastljóss höfðu farið yfir efnið var lögreglu því gert viðvart.

Skilja má á yfirlýsingu lögreglu að óljóst sé hvenær upptökurnar voru gerðar. Vegna þessa er rétt að taka fram að á upptökunum er nákvæmur kóði sem sýnir dagsetningu og tíma.

Lögreglunni var auk þess tilkynnt um það nú stuttu eftir áramót, að Kastljós hygðist senda umræddan þátt út nú í byrjun vikunnar.

Kastljós vill einnig taka fram að eftir sýningu þáttarins á mánudag hefur Kastljós fengið nokkrar ábendingar um nýrri brot Karls Vignis. Kastljós hefur bent þeim einstaklingum á að hafa samband við lögreglu. Í sumum tilfellum treystu fórnarlömbin sér ekki til þess og óskuðu eftir trúnaði, sem Kastljós virðir að sjálfsögðu.

Sigmar Guðmundsson

Helgi Seljan

Jóhannes Kr. Kristjánsson