25 ára vann 28 milljónir

Annar vinningshafi helgarinnar er kominn fram en tveir skiptu á milli sín sexföldum potti samkvæmt frétta á heimasíðu Getspár.

Vinningshafinn var heldur betur ánægður og í hálfgerðu sjokki en hann keypti sér 10 raða Lottómiða á lotto.is vann rúmar 28 skattfrjálsar milljónir. Að hans sögn var hann varla búinn að átta sig á þessu en hann fór á netið eftir útdráttinn og trúði varla sínum eigin augum í fyrstu þegar hann las vinningstölurnar.

Hann þurfti því að athuga nokkrum sinnum í viðbót til að vera viss um að þetta stæðist alveg örugglega. Vinningshafinn sem er 25 ára gamall, sagði að hann hefði spilað þó nokkuð með í Lottóinu uppá síðkastið þar sem hann hefur hug á mjög kostnaðarsömu námi en ekki séð sér fært að stunda það hingað til. Honum varð því að ósk sinni þegar hann hlaut vinninginn.

Tveir skiptu með sér fyrsta vinningi í laugardagslottóinu og fær hvor um sig  rúmlega 28 milljónir í vinning. Annar hinna heppnu keypti miðann á heimasíðu Getspár, en hinn keypti sinn miða hjá N1, Fjarðarvegi 3 á Þórshöfn.

Bónusvinningurinn skiptist líka á milli tveggja vinningshafa og hlýtur hvor þeirra rúmlega 323.000 kr.

Annar miðinn var keyptur í Happahúsinu í Kringlunni en hinn er í áskrift. Níu unnu 100.000 kr. í Jókernum. Vinningsmiðarnir voru keyptir á eftirtöldum stöðum: N1 á Þórshöfn, N1 v/Bíldshöfða, tveir á N1 v/Gagnveg, Ísjakanum í Vestmannaeyjum, Fjarðarkaupum í Hafnarfirði, Hagkaup v/Furuvelli á Akureyri, N1 v/Ártúnshöfða og Olís á Akranesi.