Reynir að fá Davíð Örn lausan

Ræðismaður Íslands í Ankara í Tyrklandi, Selim Sariibrahimoglu, ætlar að beita sér fyrir því í dag að Davíð Erni Bjarnasyni verði sleppt úr fangelsi. Þetta kemur fram á vef Rúv.

Davíð Örn var handtekinn á flugvellinum í Antalya á föstudaginn. Ástæðan var sú að hann hafði grjót í ferðatösku sinni sem sem tollverðir telja vera fornmun. Grjótið keypti hann á markaði en Davíð Örn var ásamt eiginkonu sinni, Þóru Björgu Birgisdóttur.

Selim segir í samtali við Rúv hafa reynt að fá Davíð Örn lausan strax á föstudag. Sem rök hafi hann bent á að hann væri þriggja barna faðir og engin hætta á að hann gerði tilraun til þess að flýja. Saksóknari hafi viljað kynna sér málið betur og þar sem helgi var rétt að skella á hafi beiðninni um lausn verið hafnað. Selim ætlar að senda fulltrúa sinn á fund saksóknara í dag og gera aðra tilraun.

Davíð Örn keypti grjótið á ferðamannamarkaði og borgaði, að sögn eiginkonu hans Þóru Björgu, 80 evrur fyrir eða sem nemur um 13 þúsund krónur fyrir. Hún segir þau hafa keypt þrjá steina á markaðnum en ekki gert sér neina grein fyrir að um fornmuni væri að ræða.

Selim segir Tyrki líta smygl á fornmunum mjög alvarlegum augum og refsingin sé á bilinu þrjú til sex ár í fangelsi. Hann þekkir til annarra dæma þar sem ferðamenn hafi verið handteknir grunaðir um smygl á fornmunum úr landi. Eftirlit sé sérstaklega mikið á ferðamannastöðum á borð við Antalya.