Menntun fanga minnkar líkurnar á endurkomu þeirra í fangelsi

Þeir sem stunda nám innan veggja fangelsa eru betur í stakk búnir til að takast á við lífið að afplánun lokinni og mun ólíklegri til að brjóta af sér á nýjan leik. Þetta segir afbrotafræðingur hjá fangelsismálastofnun. Alþjóðleg ráðstefna um menntun fanga hófst hér á landi í dag og stendur fram til laugardags.

Ráðstefnan er haldin á vegum European Prison Education Association eða EPEA. Um 120 þátttakendur frá 27 ríkjum sækja ráðstefnuna. Meginþema ráðstefnunnar er áherslu á hvernig haga beri undirbúningi fanga fyrir þátttöku í frekara námi og atvinnulífi að afplánun lokinni með það að markmiði draga úr endurkomu fanga í fangelsi. Aukin áhersla hefur verið lögð á þennan þátt fangelssistarfseminnar hér á landi á síðustu árum með góðum árangri.

„Það sem fangar hafa nóg af er tími. Þeir eru jú, inni í 24 tíma á sólahring. Og ef þeir geta notað hluta af þessum tíma í að mennta sig, til þess að læra, til þess að stunda einhverja meðferð til að læra á lífið þegar þeir koma út, ef þeir koma út rólegri og prúðari menn út, þá er ekki lítið unnið fyrir þá sjálfa, fyrir skattborgara og fyrir almenning í landinu,“ segir Erlendur S. Bjarnason, afbrotafræðingur hjá Fangelsismálastofnun.

Þráinn Bjarnason Farestveit, framkvæmdarstjóri Verndar fangahjálpar er einn þeirra sem mun flytja erindi á ráðstefnunni. Hann segist þekkja fjölmörg dæmi þess að fyrrverandi fangar þakki námi sínu fyrir það að hafa komist á beinu brautina á ný.

„Ég finn klárlega mun á bæði hvað varðar sjálfsvirðingu og betra sjálfsmat hjá þeim einstaklingum sem farið hafa í gegnum þetta heldur en hjá hinum. Þeir eiga kannski erfiðara með að fóta sig og átta sig kannski á því hvert stefna þeirra er í lífinu. Það er alveg klárt mál. Það er allt sem bendir til þess að þeir sem stunda nám eigi betri möguleika úti í samfélaginu heldur en hinir,“ sagði Þráinn.