Hvalur 8 í land með langreyði

Hvalskipið Hvalur 8 er komið í land með langreyði sem veiddist í gærkvöldi.

Skipið hélt út til veiða í gær ásamt Hvali 9, en heimild er fyrir því að veiða 154 langreyðar. Við það má bæta 20% óveiddra dýra frá fyrri vertíð svo mögulega verða dýrin 180.

Samkvæmt upplýsingum fréttastofu eru nokkrir mótmælendur við bryggjuna, en hátt í 200 manns eru sagðir fá vinnu vegna veiðanna á landi og sjó.

Kristján Loftsson, eigandi útgerðarinnar, sagði í samtali við fréttastofu að dýrið væri tarfur og 63 fet á lengd. Hann bætti við að skipið héldi aftur út innan skamms, en veður væri þó slæmt til veiða.