Kræklingaleyfið ekki enn komið eftir 5 ára ströggl

Fimm árum eftir að formaður Skelræktar, bóndinn á Gróustöðum við Gilsfjörð, sótti fyrst um leyfi til kræklingaræktar er hann ekki enn kominn með leyfi. Hann segir ekki standandi í því fyrir einyrkja að reyna að komast í gegnum eftirlits- og leyfisveitingakerfið.

Það er reyndar liðið heilt ár frá því bóndinn á Gróustöðum, Bergsveinn Reynisson, vakti athygli á því sem formaður hagsmunasamtaka kræklingaræktenda hversu flókið og dýrt það væri að afla tilskilinna leyfa. Fréttir af þessum flækjum í fyrra kölluðu á umræðu á Alþingi. En hefur ástandið þá ekkert skánað síðan þá?

„Nei, það hefur ekkert skánað. Það er svona heldur að, sérstaklega Umhverfisstofnun, sé að herða á okkur tökin heldur en hitt," segir Bergsveinn.

Hann segist fyrst hafa sótt um til Fiskistofu fyrir fimm árum en umsóknin strandað á því að hann lagði ekki fram endurskoðaða rekstraráætlun til þriggja ára heldur bara viðskiptaáætlun. Þegar hann sótti næst um voru komin ný lög og málið í höndum Matvælastofnunar. Hann segist þó hafa góða reynslu af starfsmönnum hennar.

„Þeir hafa allir verið af vilja gerðir til þess að vinna með okkur og nennt að setja sig inn í málin." Þar séu menn bara að drukkna í verkefnum vegna mannfæðar, þeir þurfi í einu og hálfu starfi að sinna fjölmörgum öðrum verkefnum, ekki bara í skelrækt heldur einnig heilnæmisúttektum á svæðum fyrir ígulkerjaveiðar, sæbjúgu, beitukóng og margt fleira.

Þetta sem menn héldu að væri einfalt mál, bara leggja kaðla í sjó og bíða eftir því að kræklingar festi sig á böndin og vaxi, það er flóknara en svo.

„Það er ekkert hægt að standa í þessu," segir Bergsveinn og segist í síðasta tölvupósti til Matvælastofnunar hafa sagt að það væri fínt að fá leyfið núna, eftir fimm ár, áður en hann gæfist endanlega upp.

Það gildi þó annað um stærri fyrirtæki. Þar væri þetta kannski lítið mál. En fyrir einyrkjana, litlu karlana, væri ekki hægt að standa í þessu ströggli.

Formaður Samtaka atvinnulífsins sagði í fyrra að ný lög um skeldýrarækt ætti frekar að kalla lög um bann við skeldýrarækt.