Aðild að ESB dregur úr spillingu

„Krótía býr ekki við mikið öryggi og vandinn þar er djúpstæður. Króatar, sem lítil þjóð, þurfa því að finna öryggi í einhverju stóru,“ segir Dragana Jovisic. Hún á ættir sínar að rekja til Króatíu og Bosníu en flutti til Íslands fyrir sjö árum og varð á dögunum fullgildur Íslendingur þegar hún fékk ríkisborgararétt.

Í dag fær Króatía formlega aðild að ESB og verður þar með 28. aðildarríki sambandsins. Mikil fátækt er í landinu og er von flestra að með aðild að ESB taki betri tímar við. Dragana segir að nú standi upp á króatísk stjórnvöld að taka á spillingu og standa við gerða samninga við Evrópusambandið og uppræta ójöfnuð.

„Í Króatíu er mikil spilling og með tilkomu ESB þrífst hún síður. Þar er einnig mikil fátækt og víða er ástandið mjög slæmt,“ segir Dragana.

Aðildarviðræður milli Króatíu og ESB hófust í október 2005 og í desember 2011 var skrifað undir aðildarsamninginn. Í janúar 2012 var aðildin samþykkt í þjóðaratkvæðagreiðslu en að því loknu þurftu öll aðildarríki ESB að samþykkja inngönguna.