"Kjósendur þurfa að sýna biðlund"

Allir flokkar á þingi nema Framsóknarflokkurinn bæta við fylgi sitt frá alþinginskosningum samkvæmt skoðanakönnuninni, sem birtist í Fréttablaðinu í dag.

Vigdís Hauksdóttir, þingmaður Framsóknarflokksins, segist ekki óróleg vegna þessa, en biður þó um að kjósendur sýni biðlund. „Í fyrsta lagi vil ég segja það að við tökum þessu með jafnaðargeði. Við erum náttúrulega fyrst og fremst að vinna vinnuna okkur og það tekur tíma að fara í skuldaniðurfellingu á heimilin þannig að þetta kannski lýsir einhverri óþolinmæði. Við biðjum um smá biðlund, því þetta hefst ekki á einum degi."

Aðspurð hverju það sæti að annar flokkurinn í ríkisstjórn tapi fylgi á meðan hinn bætir við sig segir Vigdís: „Við erum í samstarfi við Sjálfstæðisflokkinn og þetta er útkoman út úr þessari skoðanakönnun. En við erum að sjálfsögðu að vinna þessi mál saman ríkisstjórnarflokkarnir þannig að þetta fylgi er þá allavega á ríkisstjórninni, þannig að fólk treystir okkur. Það skiptir máli líka."

Til marks um aukið traust á Sjálfstæðisflokknum

„Það er ánægjulegt ef að stuðningur við okkur mælist vaxandi. Það ber þá vott um það að fólk hefur trú á því sem við erum að segja og gera. Það er ánægjulegt," segir Kristján Þór Júlíusson heilbrigðisráðherra og 2. varaformaður Sjálfstæðisflokksins.

Aðspurður hverju það sæti að bara annar ríkisstjórnarflokkurinn missi fylgi á meðan hinn bætir mest við sig allra flokka segir Kristján: „Þetta er bara mismunandi staða, mismunandi áherslur, breytilegar eftir hverjum tíma sem að ræður mestu um mælingu á viðhorfum fólks til stjórnmálaflokkanna. Það kann vel að vera að Framsóknarflokkurinn hafi verið í þannig málum að það vigti inn. Ég skal ekkert um það segja."