Ban Ki-moon kemur með vél Icelandair í kvöld

Ban Ki-moon, aðalframkvæmdastjóri Sameinuðu þjóðanna, kemur með áætlunarflugi Icelandair seint í kvöld, samkvæmt upplýsingum fréttastofu. Í fyrramálið hefst opinber heimsókn hans formlega með fundi með Gunnari Braga Sveinssyni, utanríkisráðherra.

Hann mun svo funda með Ólafi Ragnari Grímssyni, forseta Íslands, og Sigmundi Davíð Gunnlaugssyni, forsætisráðherra í ráðherrabústaðnum á Þingvöllum. Þá mun Ki-moon einnig heimsækja Alþingi.

Á morgun talar hann á opnum fyrirlestri í Háskóla Íslands sem ber heitið Ísland og Sameinuðu þjóðirnar: Sjálfbær framtíð fyrir alla.

Þá mun hann kynna sér starfsemi skóla Háskóla Sameinuðu þjóðanna á Íslandi og jarðhitanýtingu með heimsókn í Hellisheiðarvirkjun og áhrif loftslagsbreytinga á jökla Íslands.

Aðalframkvæmdastjóri SÞ sótti Ísland síðast heim þegar Kofi Annan kom hingað árið 1997.