"Ég vil alla vega ekki að dóttir mín leiki sér með svona!"

Myndum af mygluðu baðdóti hefur verið dreift á samfélagsmiðlum síðustu daga og hafa margir íslenskir foreldrar prófað að klippa í sundur dót barna sinna til að kanna ástandið á því. Guðbjörg Snorradóttir er í þeim hópi og hér má sjá það sem blasti við henni. „Mér brá eiginlega dálítið. Maður vill ekki að börnin séu að leika sér með dót sem er myglað og ég fékk pínu svona á tilfinninguna: „Vá, hvað ég er léleg mamma!“,“ segir Guðbjörg.

Eftir að Guðbjörg birti myndina á netinu höfðu aðrir foreldrar samband við hana og höfðu sömu sögu að segja. „Mygla er náttúrulega alltaf hættuleg og mygla í húsum hefur til dæmis verið í umræðunni. Börn eru að sprauta upp í sig vatni og svona í baðinu og ég vil alla vega ekki að dóttir mín leiki sér með svona,“ segir hún.

Guðbjörg henti dóti dóttur sinnar eins og fleiri en Micael Clausen, barnalæknir og sérfræðingur í ofnæmissjúkdómum barna, telur að það sé óþarfi. Eðlilegt sé að mygla myndist vegna rakans í leikföngunum og hita á baðherbergjum. „Það er náttúrulega mjög víða mygla og þetta er eitthvað sem við eigum bara að hreinsa í burtu og passa að komi ekki, þetta er kannski frekar ógeðfellt,“ segir Micael.

Hann mælir með að leikföngin séu tæmd af vatni, því fái þau að þorna eigi mygla ekki að myndast. Geri hún það engu að síður sé hægt að þrífa dótið til dæmis með klór eða ediki. Hann mælir með að dótið sé endurnýjað reglulega en bendir á að mygla geti einnig myndast í öðrum leikföngum, svo sem melódíkum sem börn blási í. Hann telur þó litlar líkur á að myglan geti valdið veikindum. „Ég held að það sé afar ósennilegt, ekki frekar en camembert ostur eða eitthvað þvíumlíkt,“ segir Micael.