"Ríkisstjórnin aldrei staðið frammi fyrir annarri eins tímaþröng"

 „Það eru sérstakar aðstæður vegna þess að það er kosningaár og nú eru að taka gildi í fyrsta sinn reglur um að tekjuöflunarfrumvörpin eigi að koma samhliða fjárlagafrumvarpinu,“ segir Bjarni Benediktsson fjármálaráðherra um fyrirhugaða frestun þings í haust.

Fram kom í fréttum Stöðvar 2 að fjármálaráðherra og forsætisráðherra hafi óskað eftir því við oddvita stjórnarandstöðuflokkanna að þeir samþykktu að Alþingi yrði ekki sett fyrr en þremur vikum síðar en gert er ráð fyrir. Þannig myndi þingið hefjast 1. október en ekki 10. september.

Bjarni segir að af fyrrgreindum ástæðum hafi ríkisstjórnin aldrei áður staðið frammi fyrir annarri eins tímaþröng. Allur undirbúningur að gerð nauðsynlegra frumvarpa sé skammt á veg kominn. Oddvitar þingflokkanna hafi tekið bón ráðherranna vel. „Við erum ekki búin að ljúka því samtali en ég finn fyrir því að það er mikill skilningur á þessu.“