Íslensk fræðibók um hrunið gefin út samtímis í Bandaríkjunum og Evópu

„Þetta er svona á stærri skala en ég hef áður verið á,“ segir Dr. Eiríkur Bergmann, prófessor við Háskólann á Bifröst, en eitt virtasta útgáfufélag á sviði fræðibóka, Palgrave Macmillan, ætlar að gefa út fræðirit Eiríks um hrunið hér á landi.  Bókin heitir „Iceland and the international financial crisis: Boom, Bust and Recovery“.

Bókin verður gefin út samtímis í Evrópu og í Bandaríkjunum en um er að ræða einn viðamesta dreifingasamning sem íslenskur fræðimaður á sviði félagsvísinda hefur gert á frumsömdu fræðiefni.

Eiríkur segist hafa sent handritið út og fengið gríðarlega sterk viðbrögð. Um ástæður þess að áhuginn sé svona mikill á íslenskum fræðibókum um hrunið svarar Eiríkur: „Málið er að Ísland er alveg einstakt dæmi í þessari heimskrísu, og það er mikill áhugi að skoða kreppuna út frá okkar aðstæðum.“

Eiríkur útskýrir að kreppan hér hafi verið mun tærari, í þeim skilningi að hér hafi orðið mjög augljóst hrun og svo hefur endurreisnin verið mun hraðari hér en annarsstaðar. „Þannig margir líta á þetta sem mjög áhugavert dæmi,“ bætir Eiríkur við.

Í bókinni er birt heildstæð efnahagsleg, sagnfræðileg og stjórnmálaleg rannsókn á efnihagshruninu og viðbrögðunum við því. Farið yfir hagsögu Íslands frá öndverðu og greint hvað það er sem veldur meiri hagsveiflum á Íslandi en í öðrum vestrænum ríkjum auk þess sem dreginn er lærdómur fyrir önnur ríki og almennt fyrir efnahagskerfi heimsins.

Spurður hvað taki nú við segist Eiríkur næsta skref að klára bókina. Forlagið féllst á fyrsta uppkastið, nú þarf að skrifa það næsta, og það sem flækir málin ennfrekar, er að Eiríkur þarf að bíða eftir að ný ríkisstjórn verði mynduð. „Bókin ætti svo að koma út öðru hvoru megin við næstu áramót,“ segir Eiríkur.