Ferguson á bestu ákvörðun íþróttasögunnar

Skiptingar Sir Alex Ferguson, fyrrum stjóra Man. Utd, í úrslitaleik Meistaradeildarinnar árið 1999 hafa verið valdar bestu ákvarðanirnar í íþróttasögunni.

Ferguson sendi þá Teddy Sheringham og Ole Gunnar Solskjær á vettvang í síðari hálfleik. Þeir skoruðu báðir og tryggðu Man. Utd sigur í Meistaradeildinni á dramatískan hátt.

Þessi ákvörðun hafði betur en 49 aðrar sem Sky Sports valdi í þessa könnun.

Man. Utd vann þrennuna þetta tímabil og þetta var líka í fyrsta skipti síðan 1968 sem liðið vann Meistaradeildarbikarinn.

"Skilaboðin frá Ferguson voru mjög einföld. Komdu okkur aftur inn í leikinn. Einn af helstu styrkleikum Alex var ákvarðanataka hans meðan á leik stóð. Hann treysti öllum sínum leikmönnum og menn sem sátu á bekknum voru alltaf rólegir og vissu að þeir myndu fá sitt verkefni síðar. Þetta var dramatískt kvöld sem hvorki við né stuðningsmenn munu gleyma," sagði Sheringham.

Topp fimm listinn hjá Sky.

1. Skiptingar Sir Alex Ferguson í úrslitaleik Meistaradeildarinnar árið 1999.

2. Barcelona ákvað að borga heilsugæslureikninga fyrir hinn 11 ára gamla Lionel Messi. Hann varð fyrir vikið að flytja til Spánar og skrifa undir við félagið.

3. Rafa Benitez, fyrrum stjóri Liverpool, setur miðjumanninn Didi Hamann inn á fyrir varnarmanninn Steve Finnan í úrslitaleik Meistaradeildarinnar árið 2005. Liverpool jafnaði 3-3 og vann svo í vítakeppni.

4. Sir Alex Ferguson kaupir Frakkann Eric Cantona frá Leeds á 1 milljón punda.

5. Arsenal ræður Arsene Wenger sem stjóra. Hann breytir liðinu og kemur með menn eins og Thierry Henry og Patrick Vieira til félagsins.