Hvorki forsetinn né menntamálaráðherra tóku á móti Anítu

Hvorki forseti Íslands né menntamálaráðherra tóku á móti Anítu Hinriksdóttur, heims- og Evrópumeistara í 800 metra hlaupi, þegar hún kom til landsins í nótt.

Hefð hefur verið fyrir því að taka á móti íslenskum íþróttaköppum sem standa sig vel á mótum erlendis með viðhöfn. Prúðbúin móttökunefnd beið Anítu þegar hún kom til landsins í nótt þar á meðal Lárus Blöndal, forseti ÍSÍ, og Benóný Jónsson, varaformaður Frjálsíþróttasambands Íslands. Ólafur Ragnar Grímsson forseti, verndari Íþrótta- og Ólympíusambands Íslands, og Illugi Gunnarsson, ráðherra íþróttamála, voru hins vegar fjarri góðu gamni.

Aníta varð heimsmeistari í 800 metra hlaupi kvenna á heimsmeistaramóti 17 ára og yngri í Donetsk í Úkraínu þann 14. júlí síðastliðinn. Sex dögum síðar bætti hún við Evrópumeistaratitli í 800 metra hlaupi á EM 19 ára og yngri sem fram fór á Ítalíu.

Ekki fengust svör frá skrifstofu forsetans hvers vegna Ólafur Ragnar Grímsson hefði ekki tekið á móti þessari efnilegustu hlaupakonu sem Íslendingar hafa átt. Þar eru allir í sumarfríi.

Reykjavíkurborg mun aftur á móti efna til móttöku í Höfða klukkan hálf fimm í dag til heiðurs Anítu. Dagur B. Eggertsson, staðgengill borgarstjóra, mun þar taka á móti Anítu og þjálfurum hennar og færa þeim hamingjuóskir í tilefni hins glæsilega árangurs.

Uppfært kl. 15.57:

"Við sendum Anítu skeyti til hvatningar fyrir Evrópumótið. Í morgun sendum við henni blómvönd og heillaóskakort," segir Illugi Gunnarsson menntamálaráðherra. "Síðan var búið að taka ákvörðun um að bjóða henni, fjölskyldu hennar og forystumönnum úr íþróttahreyfingunni til móttöku í ráðherrabústaðnum."