Umfjöllun um ofbeldi í skólum: Þörf á að móta viðbrögð í þessum málum

Þegar Barnavernd Reykjavíkur fær til sín mál sem varða brot á börnum í skólakerfinu fer af stað tvíþætt ferli, annars vegar gagnvart fullorðna aðilanum sem er talinn hafa brotið á barni og hins vegar gagnvart barninu sjálfu. Í vikunni ræddum við við móður barns sem sakar kennara sinn um að hafa lagt sig í einelti í tvö ár. Það mál fór til Barnaverndar en var svo vísað aftur til skólans og segir Halldóra Gunnarsdóttir, framkvæmdastjóri Barnaverndar, ástæðuna þá að hún geti aðeins gert tillögur til úrbóta en ekki tekið ákvarðanir varðandi framtíð skólastarfsmanna eða veitt áminningar, slíkt sé í höndum skólayfirvalda. Því hafi málinu verið vísað aftur í skólann. „Við höfum ekki aðrar leiðir, nema þá að óska lögreglurannsóknar og það er gert í einstaka tilvikum,“ segir Halldóra.

Spurð um hvort ekki sé óeðlilegt að ætlast til þess að skólinn rannsaki eigin innviði, segir Halldóra að ásamt skólunum, fái skóla- og frístundasvið alltaf afrit af niðurstöðum Barnaverndar. „Og það er kannski ekki óeðlilegt að halda að þeir geti tekið á sínu starfsmannahaldi, sínum starfsmannnamálum og líðan barnanna í sínum skólum,“ segir hún.

Halldóra tekur undir að ástæða væri til að móta betur viðbrögð í málum sem varða ofbeldi í skólum. „Og ég held að Barnavernd Reykjavíkur, skóla- og frístundasvið og aðrir sem koma að þessum málum gætu alveg stillt betur saman strengi og held það væri eðlilegt að gera það.“

Svo þú ert sammála því að það vanti meiri yfirsýn og betra utanumhald um þessi mál?

„Ég er sammála því að við þurfum að setjast niður og skoða þetta. Það er enginn svo fullkominn að ekki sé hægt að bæta sig. Það er enginn hafinn yfir gagnrýni.“

Halldóra kveðst ekki hafa þekkingu til að svara því hvort eineltisáætlunum sé fylgt nógu vel eftir. „En það þarf kannski að skoða hvort innan þessara eineltisáætlana sé tekið á einelti fullorðinna, gagnvart börnum.“