Kristinn ætlar í atvinnumennsku

Landsliðsmaðurinn Kristinn Jónsson stefnir á að koma sér í atvinnumennsku á næstu mánuðum. Þessi magnaði 23 ára bakvörður Blika hefur verið að spila með Blikaliðinu frá því árið 2007 og síðustu ár verið einn af betri leikmönnum Pepsi-deildarinnar.

Hann fór út til Noregs á dögunum og æfði þá bæði með Start og Sogndal.

„Ég fór fyrst til Start eftir Noregsleikinn. Var reyndar bara að heimsækja Gumma Kristjáns félaga minn sem spilar með liðinu. Fékk að æfa með þeim fyrst ég var þarna. Svo fór ég til Sogndal,“ segir Kristinn en hvernig leist honum á?

„Mér leist bara vel á þetta. Það er klárlega skref upp á við að fara til Noregs. Skref sem ég stefni á að taka enda tel ég þetta vera tímann fyrir mig að taka næsta skref á mínum ferli.“

Kristinn segir að draumurinn sé að spila í Belgíu eða Hollandi en núna sé aðallega verið að horfa á Skandinavíu. Hann á eitt ár eftir af samningi sínum við Blika.

Kristinn hefur verið í landsliðshópi Íslands upp á síðkastið og er í hópnum fyrir Króatíuleikina. Hann ætlar sér stóra hluti með landsliðinu.

„Mitt markmið er að setja pressu á vinstri bakvörðinn og komast í byrjunarliðið.“