Mikið álag á ferðamannastaði í dag

Yfir tíu þúsund manns komu til landsins í dag með fimm skemmtiferðaskipum. Aldrei nokkurn tímann hafa svo margir komið með skemmtiferðaskipum á einum degi. Mikil öryggisgæsla var á svæðinu og leitaði lögreglan að hugsanlegum laumufarþega.

Það var glatt yfir ferðamönnum þegar fréttastofu bar að í miðri þokunni á Sundahöfn í dag. Alls lögðust fimm skip að þremur höfnum í dag. Fjögur skipanna lögðust að í Reykjavík á meðan eitt lagðist að í Hafnarfirði.

Fjölmargar rútur tóku á móti gestunum og yfir sextíu leiðsögumenn aðstoðuðu ferðamenn að finna sína rútu áður en haldið var á brott. Og það er ljóst að dagurinn verður vel nýttur hjá ferðamönnunum

„Við erum með ýmsar ferðir, það verður farið gullna hringinn og fleira,“ segir Anna B. Gunnarsdóttir, verkefnastjóri hjá Atlantik sem tók á móti ferðamönnunum. Hún segir að allt í allt hafi yfir tíu þúsund manns komið með skipunum í dag.

Gestirnir eru flestir frá Bandaríkjunum og Þýskalandi og auðvitað víðar. Það er einsýnt að þessi mikli fjöldi mun auka álagið allverulega á helstu ferðamannastaði landsins.

„Við erum jú að nálgast þolmörkin,“ segir Anna sem bætir við að það sé reynt að haga ferðalaginu þannig að allir fari ekki á sama staðinn á sama tíma.

Simon Egerton frá Englandi var á leiðinni niður í miðbæ Reykjavíkur til þess að skoða sig um. Og honum var kalt.

„Það er töluvert kaldara hér en á Englandi,“ sagði Simon sem var kappklæddur, í úlpu og með húfu.

Mikil öryggisgæsla var á svæðinu þegar fréttamann bar að garði, tveir lögreglubílar keyrðu um höfnina og fengust þau svör að þeir væru að leita að manni sem ætlaði hugsanlega að lauma sér um borð í eitt af skipunum. Sá fannst þó ekki í dag samkvæmt upplýsingum fréttastofu. 

Öll skipin nema eitt halda svo för sinni áfram í kvöld.